Heavy Rainfall in Gajpati: ଗର୍ଜୁଛି ଗଣ୍ଡାହାତୀ ଜଳପ୍ରପାତ, ଧସୁଛି ପାହାଡ଼! ବନ୍ୟାର ଭୟଙ୍କର ରୂପ

ଗଜପତିରେ କୋହ ଫଟାଇ କାନ୍ଦୁଛି ମଣିଷ।

ଚାରିଆଡ଼େ ପ୍ରକୃତିର ପ୍ରଳୟଙ୍କରୀ ରୂପ ।

ପାଣିର ପ୍ରଖର ସ୍ରୋତ ପାହାଡ଼କୁ ଭାଙ୍ଗିଦେବାକୁ ଯେମିତି ପଣ କରିଛି ।

ଆଉ ପଥରକୁ ଖଣ୍ଡ ଖଣ୍ଡ କରି ଚୁରମାର କରିବାକୁ ମାଡ଼ି ଆସୁଛି ।

ପ୍ରକୃତିର ଏ ଭୟଙ୍କର ତାଣ୍ଡବ ଆଗରେ ଅସହାୟ ହୋଇପଡ଼ିଛି ମଣିଷ ।

କେଉଁଠି ପାହାଡ଼ ଧସୁଛି, ତ ପୁଣି କେଉଁଠି ନଦୀ ଛାତି ଫୁଲାଇ ଗାଁ ଆଡ଼କୁ ମାଡ଼ି ଆସୁଛି ।

ଆଖି ଆଗରେ ବଦଳିଯାଉଛି ସବୁ କିଛି ।

ବାତ୍ୟା 'ଅର୍ଣ୍ଣବ'ର ଅବିସ୍ରାନ୍ତ ବର୍ଷା ଏଠି ସବୁ କିଛି ଛିନଛତ୍ର କରିଛି ।

ବନ୍ୟାପାଣିର ଗର୍ଜନ ଆଗରେ ମଣିଷର କୋହ ଆଉ କାହାକୁ ଶୁଭୁନି ।

ଗଜପତିର ପ୍ରସିଦ୍ଧ ଗଣ୍ଡାହାତୀ ଜଳପ୍ରପାତର ଭୟଙ୍କର ରୂପ ।

ପାହାଡ଼ ଉପରୁ ଗର୍ଜନ କରି ତଳକୁ ଖସୁଛି ପାଣି ।

ସେପଟେ ପ୍ରବଳ ବର୍ଷା ପରେ କଇଁପୁର-ଗଙ୍ଗାବାଡ଼ ମୁଖ୍ୟ ରାସ୍ତାରେ ଭୂସ୍ଖଳନ ଘଟିଛି ।

ପାହାଡ଼ ଧସି ରାସ୍ତାର ପ୍ରାୟ ୫୦ ମିଟର ପର୍ଯ୍ୟନ୍ତ ମାଟି ଓ ପଥର ଜମିଛି ।

ଫଳରେ ଯାତାୟାତ ଠପ୍ ହୋଇଛି ।

ଗଜପତିରେ ବଂଶଧାରା ଓ ମହେନ୍ଦ୍ରତନୟା ନଦୀ ବି ଫୁଲିବାରେ ଲାଗିଛି।

କାଶୀନଗରରେ ବଂଶଧାରା ଜଳସ୍ତର ବିପଦ ସଙ୍କେତ ୫୪.୬୦ ମିଟରକୁ ଅତିକ୍ରମ କରି ୫୫.୬୦ ମିଟରରେ ପହଞ୍ଚିଛି ।

ତେଣୁ ନଦୀକୂଳିଆ ଲୋକଙ୍କ ମନରେ ଛନକା ପଶିଛି ।

ଗୋଷାଣୀ ବ୍ଲକର ବାଘଶାଳା, ସର୍ଧାପୁର, ଲିଙ୍ଗିପୁର, ବଡ଼କତ୍ତୁରୁ, ଗୁରାଣ୍ଡି ଓ ମହାଦେଇପୁର ସମେତ ଅନେକ ଗାଁକୁ ଜଳମଗ୍ନ କରିଛି ।

ରାୟଗଡ଼ ବ୍ଲକ ସହ ପାରଳାଖେମୁଣ୍ଡି ସହର ପ୍ରତି ମଧ୍ୟ ବିପଦ ଆଶଙ୍କା ବଢ଼ିଛି ।

ଉପରମୁଣ୍ଡରେ ଲଗାଣ ବର୍ଷା ଜାରି ରହିଥିବାରୁ ଆଗକୁ ଜଳସ୍ତର ଆହୁରି ବଢ଼ିବାର ଆଶଙ୍କା ରହିଛି ।

ତେଣୁ ସ୍ଥିତି ଉପରେ ନଜର ରଖିଛି ପ୍ରଶାସନ।

Advertisment