Iran Plans to Hit Undersea Cables: ଇରାନ ଟାର୍ଗେଟ୍‌ରେ ଇଣ୍ଟରନେଟ୍ କେବୁଲ୍! କଟିଗଲେ ଠପ୍ ହୋଇଯିବ ହ୍ୱାଟ୍ସଆପ ଓ ୟୁପିଆଇ ସେବା

ଡିଜିଟାଲ୍ ଦୁନିଆରେ ଇଣ୍ଟରନେଟ୍ ହେଉଛି ଯୋଗାଯୋଗର ମୁଖ୍ୟ ଆଧାର।

ଅନଲାଇନ୍ ପେମେଣ୍ଟଠାରୁ ଆରମ୍ଭ କରି ମେସେଜିଂ ଆପ୍‌, ଭିଡିଓ ଷ୍ଟ୍ରିମିଂ ଓ କ୍ଲାଉଡ୍ ସେବା ପର୍ଯ୍ୟନ୍ତ ପ୍ରାୟ ସବୁ କ୍ଷେତ୍ରରେ ଇଣ୍ଟରନେଟ୍‌ର ଆବଶ୍ୟକତା ରହିଛି।

ତେବେ ଆମେ ବ୍ୟବହାର କରୁଥିବା ଏହି ଇଣ୍ଟରନେଟ୍‌ର ଏକ ବଡ଼ ଅଂଶ ସମୁଦ୍ର ତଳେ ବିଛାଯାଇଥିବା ସ୍ୱତନ୍ତ୍ର କେବୁଲ୍‌ ମାଧ୍ୟମରେ ଗୋଟିଏ ଦେଶରୁ ଅନ୍ୟ ଦେଶକୁ ପହଞ୍ଚିଥାଏ।

ଏବେ ଆମେରିକା ଓ ଇରାନ ମଧ୍ୟରେ ବଢ଼ୁଥିବା ଉତ୍ତେଜନା ଏହି ଅତ୍ୟାବଶ୍ୟକ ଡିଜିଟାଲ୍ ଭିତ୍ତିଭୂମିର ସୁରକ୍ଷାକୁ ନେଇ ଚିନ୍ତା ବଢ଼ାଇଛି।

Advertisment ଇରାନର ଟାର୍ଗେଟ୍‌ରେ ସମୁଦ୍ର ତଳେ ଥିବା କେବୁଲ୍‌?

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପକ୍ଷରୁ ଇରାନ ବିରୋଧରେ ପୁଣି ସାମରିକ କାର୍ଯ୍ୟାନୁଷ୍ଠାନର ଧମକ ମିଳିବା ପରେ ଏହି ପ୍ରସଙ୍ଗ ଚର୍ଚ୍ଚାକୁ ଆସିଛି।

ରଏଟର୍ସର ଏକ ରିପୋର୍ଟ ଅନୁସାରେ, ଆମେରିକା ଓ ଇସ୍ରାଏଲ୍ ପୁଣି ଇରାନ ଉପରେ ଆକ୍ରମଣ କଲେ ପାରସ୍ୟ ଉପସାଗର ଅଞ୍ଚଳରେ ସମୁଦ୍ର ତଳେ ବିଛାଯାଇଥିବା ଯୋଗାଯୋଗ କେବୁଲ୍‌କୁ ଟାର୍ଗେଟ୍ କରିବା ନେଇ ଇରାନ ଚଳାଇଛି ପ୍ରସ୍ତୁତି।

କାହିଁକି ଗୁରୁତ୍ୱପୂର୍ଣ୍ଣ ହର୍ମୁଜ୍ ପ୍ରଣାଳୀ?

ହର୍ମୁଜ୍ ପ୍ରଣାଳୀ ବିଶ୍ୱର ଏକ ଗୁରୁତ୍ୱପୂର୍ଣ୍ଣ ସାମୁଦ୍ରିକ ମାର୍ଗ।

ଏହି ଅଞ୍ଚଳ ଦେଇ ତୈଳ ଓ ଅନ୍ୟାନ୍ୟ ସାମଗ୍ରୀ ପରିବହନ କରୁଥିବା ଜାହାଜ ଯାତାୟାତ କରିଥାଏ।

ଏହା ସହିତ ଉପସାଗରୀୟ ଅଞ୍ଚଳରେ ସମୁଦ୍ର ତଳେ ଅନେକ ଯୋଗାଯୋଗ କେବୁଲ୍ ମଧ୍ୟ ବିଛାଯାଇଛି।

Advertisment ଏହି କେବୁଲ୍‌ଗୁଡ଼ିକ ମାଧ୍ୟମରେ ଏସିଆ, ୟୁରୋପ ଓ ମଧ୍ୟପ୍ରାଚ୍ୟ ମଧ୍ୟରେ ଡିଜିଟାଲ୍ ତଥ୍ୟ ଆଦାନପ୍ରଦାନ ହୋଇଥାଏ।

ଆନ୍ତର୍ଜାତୀୟ ଇଣ୍ଟରନେଟ୍ ଟ୍ରାଫିକ୍‌ର ଏକ ବଡ଼ ଅଂଶ ଏହି ସମୁଦ୍ର ତଳ କେବୁଲ୍ ଉପରେ ନିର୍ଭରଶୀଳ।

ତେଣୁ ଏହି କେବୁଲ୍‌ଗୁଡ଼ିକରେ ବଡ଼ ଧରଣର କ୍ଷତି ହେଲେ ଅନେକ ଦେଶର ଇଣ୍ଟରନେଟ୍ ସେବା ପ୍ରଭାବିତ ହୋଇପାରେ।

କେବୁଲ୍ କଟିଗଲେ କ'ଣ ହେବ?

ସମୁଦ୍ର ତଳେ ଥିବା କେବୁଲ୍‌ଗୁଡ଼ିକ କ୍ଷତିଗ୍ରସ୍ତ ହେଲେ ଇଣ୍ଟରନେଟ୍‌ର ଗତି ହ୍ରାସ ପାଇବା ସହ କେତେକ ଅଞ୍ଚଳରେ ସଂଯୋଗ ବାଧାପ୍ରାପ୍ତ ହୋଇପାରେ।

ବିଶେଷକରି ଯେଉଁ ଦେଶ କିମ୍ବା ଅଞ୍ଚଳ ନିର୍ଦ୍ଦିଷ୍ଟ କେବୁଲ୍ ମାର୍ଗ ଉପରେ ଅଧିକ ନିର୍ଭର କରେ, ସେଠାରେ ଏହାର ପ୍ରଭାବ ଅଧିକ ଅନୁଭୂତ ହୋଇପାରେ।

ଏପରି ସ୍ଥିତିରେ ଅନଲାଇନ୍ ବ୍ୟାଙ୍କିଂ, କ୍ଲାଉଡ୍ ଡାଟା ସେବା, ସୋସିଆଲ୍ ମିଡିଆ, ଭିଡିଓ ଷ୍ଟ୍ରିମିଂ ଏବଂ କୃତ୍ରିମ ବୁଦ୍ଧିମତ୍ତା (AI) ଆଧାରିତ କେତେକ ସେବାରେ ସମସ୍ୟା ଦେଖାଦେଇପାରେ।

ଅନ୍ୟପକ୍ଷରେ ଅନେକ ଦେଶରେ ବିକଳ୍ପ କେବୁଲ୍ ମାର୍ଗ ଥିବାରୁ ଗୋଟିଏ କିମ୍ବା କିଛି କେବୁଲ୍ କ୍ଷତିଗ୍ରସ୍ତ ହେଲେ ସମଗ୍ର ବିଶ୍ୱର ଇଣ୍ଟରନେଟ୍ ଏକାଥରେ ବନ୍ଦ ହୋଇଯିବ ବୋଲି କହିବା ଠିକ୍ ନୁହେଁ।

ଭାରତରେ ୟୁପିଆଇ ଓ ହ୍ୱାଟ୍ସଆପ ବନ୍ଦ ହୋଇଯିବ କି?

ଭାରତରେ ମଧ୍ୟ ଅନ୍ତର୍ଜାତୀୟ ଇଣ୍ଟରନେଟ୍ ସଂଯୋଗ ପାଇଁ ସମୁଦ୍ର ତଳ କେବୁଲ୍‌ର ଗୁରୁତ୍ୱ ରହିଛି।

ଯଦି ଉପସାଗରୀୟ ଅଞ୍ଚଳରେ ଏକାଧିକ ମୁଖ୍ୟ କେବୁଲ୍ କ୍ଷତିଗ୍ରସ୍ତ ହୁଏ ଏବଂ ବିକଳ୍ପ ମାର୍ଗରେ ଚାପ ବଢ଼େ, ତେବେ ଭାରତର କେତେକ ଇଣ୍ଟରନେଟ୍ ସେବାରେ ମନ୍ଥରତା କିମ୍ବା ବାଧା ଦେଖାଦେଇପାରେ।

ହ୍ୱାଟ୍ସଆପ, ୟୁଟ୍ୟୁବ, କ୍ଲାଉଡ୍ ସେବା ଓ ଅନ୍ୟ ଅନଲାଇନ୍ ପ୍ଲାଟ୍‌ଫର୍ମର ସଂଯୋଗ ପ୍ରଭାବିତ ହେବାର ସମ୍ଭାବନା ରହିଛି।

ୟୁପିଆଇ ଭଳି ଡିଜିଟାଲ୍ ପେମେଣ୍ଟ୍ ସେବାରେ ମଧ୍ୟ ନେଟୱର୍କ ସମସ୍ୟାର ପ୍ରଭାବ ପଡ଼ିପାରେ।

କିନ୍ତୁ କେବୁଲ୍ କଟିବା ମାତ୍ରେ ଭାରତରେ ୟୁପିଆଇ ପେମେଣ୍ଟ୍ କିମ୍ବା ହ୍ୱାଟ୍ସଆପ ସେବା ସମ୍ପୂର୍ଣ୍ଣ ବନ୍ଦ ହେବନାହିଁ।

ବିଶ୍ୱ ଇଣ୍ଟରନେଟ୍ ପାଇଁ ବଢ଼ୁଛି ଚିନ୍ତା ବିଶ୍ୱର ଅଧିକାଂଶ ଆନ୍ତର୍ଜାତୀୟ ଡାଟା ଟ୍ରାଫିକ୍ ସମୁଦ୍ର ତଳେ ବିଛାଯାଇଥିବା ଫାଇବର୍-ଅପ୍ଟିକ୍ କେବୁଲ୍ ମାଧ୍ୟମରେ ଯାତାୟାତ କରେ।

ତେଣୁ ଏହି କେବୁଲ୍‌ଗୁଡ଼ିକର ସୁରକ୍ଷା କେବଳ ଟେଲିକମ୍ କମ୍ପାନୀଙ୍କ ପାଇଁ ନୁହେଁ, ବରଂ ବିଶ୍ୱ ଅର୍ଥନୀତି, ବ୍ୟାଙ୍କିଙ୍ଗ, ବାଣିଜ୍ୟ ଓ ଯୋଗାଯୋଗ ବ୍ୟବସ୍ଥା ପାଇଁ ମଧ୍ୟ ଅତ୍ୟନ୍ତ ଜରୁରୀ।