Nepal Flood Horror: ନେପାଳ ବନ୍ୟାରେ ଭାସିଆସିଲା ବ୍ୟାଙ୍କ ଲକର୍, ଟଙ୍କା ନେଉଥିବାବେଳେ ୨୯ ଗିରଫ

ନେପାଳର ବିଭିନ୍ନ ଅଞ୍ଚଳରେ ପ୍ରଳୟଙ୍କରୀ ବନ୍ୟା ତାଣ୍ଡବ ରଚିଥିବା ବେଳେ ରାସୁୱା ଓ ଉପରମୁଣ୍ଡ ଅଞ୍ଚଳରୁ ଏକ ବ୍ୟାଙ୍କ ଲକର୍ ବନ୍ୟାଜଳରେ ଭାସିଯାଇ ତ୍ରିଶୂଳୀ ଦେଇ ଧାଦିଙ୍ଗରେ ପହଞ୍ଚିଥିଲା। ସେଠାରେ ଏହାକୁ ଭାଙ୍ଗି ଭିତରୁ ଟଙ୍କା ନେଉଥିବା ଅଭିଯୋଗରେ ୨୯ ଜଣଙ୍କୁ ଗିରଫ କରାଯାଇଛି। ବନ୍ୟାରେ ଭାସିଯିବା ପରେ ଲକରଟି ନଦୀ ସ୍ରୋତରେ ତଳକୁ ତଳକୁ ଭାସି ଧାଦିଙ୍ଗରେ ପହଞ୍ଚିଥିଲା।

ରିପୋର୍ଟ ଅନୁସାରେ, ସଶସ୍ତ୍ର ପୋଲିସ୍ ବାହିନୀ ଏବଂ ନେପାଳ ପୋଲିସର ଏକ ମିଳିତ ପାଟ୍ରୋଲିଂ ଟିମ୍‌ ଘଟଣାସ୍ଥଳରେ ପହଞ୍ଚିଥିଲା। ସେତେବେଳେ ସନ୍ଦିଗ୍ଧମାନେ କ୍ଷତିଗ୍ରସ୍ତ ଲକରରୁ ଟଙ୍କା ବାହାର କରୁଥିବା ଅଭିଯୋଗ ରହିଛି। ଅଧିକାରୀମାନେ ସେମାନଙ୍କଠାରୁ ମୋଟ ୯୨,୬୮,୫୦୫ ନେପାଳୀ ଟଙ୍କା ନଗଦ ଜବତ କରିବା ସହ ୨୯ ଜଣଙ୍କୁ ହେପାଜତକୁ ନେଇଛନ୍ତି।

ନେପାଳ ପୋଲିସ୍‌ର ମୁଖପାତ୍ର ତଥା ଡେପୁଟି ଇନ୍ସପେକ୍ଟର ଜେନେରାଲ୍ (DIG) ଅବି ନାରାୟଣ କାଫ୍ଲେଙ୍କ ଅନୁସାରେ, ସମସ୍ତ ୨୯ ଜଣ ସନ୍ଦିଗ୍ଧ ବର୍ତ୍ତମାନ ଧାଦିଙ୍ଗ ଜିଲ୍ଲା ପୋଲିସ୍ କାର୍ଯ୍ୟାଳୟରେ ହେପାଜତରେ ଅଛନ୍ତି। ପୋଲିସ୍ ଘଟଣାର ଅଧିକ ତଦନ୍ତ କରିବା ସହ ଆଇନଗତ ପ୍ରକ୍ରିୟା ଆରମ୍ଭ କରିଛି।

ଏପଟେ ବନ୍ୟାରେ ନାରାୟଣୀ ନଦୀରେ ଭାସିଯାଇଥିବା ଜଣେ ମହିଳାଙ୍କ ମୃତଦେହରୁ ସୁନା କାନଫୁଲ ଚୋରି କରିଥିବା ଅଭିଯୋଗରେ ନେପାଳ ପୋଲିସ୍ ଆଉ ଦୁଇଜଣଙ୍କୁ ଗିରଫ କରିଛି। ଘଟଣାର ଏକ ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହେବା ପରେ ପୋଲିସ୍ ଏହି ଦୁଇଜଣଙ୍କୁ ଚିହ୍ନଟ କରିଥିଲା।

୪୧ ସେକେଣ୍ଡର ଏହି ଭିଡିଓରେ ଦୁଇଜଣ ବ୍ୟକ୍ତି ନଦୀରୁ ମହିଳାଙ୍କ ମୃତଦେହକୁ ଟାଣି ବାହାର କରୁଥିବା ଏବଂ ପରେ ତାଙ୍କ ଦୁଇ କାନରୁ କାନଫୁଲ କାଢ଼ୁଥିବା ଦେଖାଯାଇଥିଲା। ପରେ ନେପାଳ ପୋଲିସ୍ ମଧ୍ୟ ଭିଡିଓଟି ସେୟାର କରି ମୃତ ମହିଳାଙ୍କ କାନଫୁଲ ଚୋରି ଅଭିଯୋଗରେ ଦୁଇଜଣଙ୍କୁ ହେପାଜତକୁ ନିଆଯାଇଥିବା କହିଛି।

ଭିଡିଓରେ ଦୁଇଜଣ ବ୍ୟକ୍ତି କାଠର ପଟା ଏବଂ ମହିଳାଙ୍କ କେଶର ସାହାଯ୍ୟରେ ତାଙ୍କ ମୃତଦେହକୁ ପାଣିରୁ ଟାଣି ବାହାର କରୁଥିବା ଦେଖାଯାଉଛି। ଏହାପରେ ସେମାନେ ମହିଳାଙ୍କ ଦୁଇ କାନରୁ କାନଫୁଲ କାଢ଼ି ଅଲଗା କରି ରଖୁଥିବା ନଜର ଆସିଛି। ଘଟଣାସ୍ଥଳରେ ଆଉ କିଛି ଲୋକ ମଧ୍ୟ ଦେଖାଯାଉଛନ୍ତି, ଯେଉଁମାନଙ୍କ ମଧ୍ୟରୁ କେତେକ ନିଜ ମୋବାଇଲ୍‌ରେ ଘଟଣାର ଭିଡିଓ ରେକର୍ଡ କରୁଥିଲେ।

ଏପଟେ ଫ୍ଲାସ୍ ଫ୍ଲଡ୍ ଏବଂ ଭୂସ୍ଖଳନ ପରେ ନେପାଳରେ ବଡ଼ ଧରଣର ଉଦ୍ଧାର ଅଭିଯାନ ଜାରି ରହିଛି। ନେପାଳ-ତିବ୍ବତ ସୀମା ଅଞ୍ଚଳରେ ଆସିଥିବା ପ୍ରଳୟଙ୍କରୀ ବନ୍ୟାରେ ଗାଁ, ରାସ୍ତା, ବ୍ରିଜ୍ ଏବଂ ଅନ୍ୟାନ୍ୟ ଭିତ୍ତିଭୂମି ନଷ୍ଟଯାଇଛି।