What does Murasu mean? ବାତ୍ୟା ‘ମୁରାସୁ’ ନାଁ ପଛରେ କ’ଣ ରହିଛି ରହସ୍ୟ? କିଏ ଦେଇଛି ନାଁ... ଜାଣନ୍ତୁ ପୂରା କାହାଣୀ

ଆନ୍ଧ୍ରପ୍ରଦେଶ ଉପକୂଳ ଆଡ଼କୁ ମୁହାଁଇଥିବା ସମ୍ଭାବ୍ୟ ବାତ୍ୟାର ନାମ 'ମୁରାସୁ'କୁ ନେଇ ଏବେ ଚର୍ଚ୍ଚା।

Cyclone Murasu ନାଁ ଶୁଣିବାକୁ ଯେତିକି ଅଲଗା, ଏହା ପଛରେ ରହିଛି ତାମିଲ୍‌ ସଂସ୍କୃତି ଓ ପରମ୍ପରାର ଏକ ସ୍ୱତନ୍ତ୍ର କାହାଣୀ।

'ମୁରାସୁ' ଏକ ତାମିଲ୍‌ ଶବ୍ଦ।

ଏହାର ଅର୍ଥ ହେଉଛି ବଡ଼ ଢୋଲ ବା ନଗାରା।

ପୁରାତନ କାଳରେ ଯୁଦ୍ଧ ସମୟରେ ସୈନ୍ୟମାନଙ୍କୁ ସଙ୍କେତ ଦେବା, ଉତ୍ସବ ପାଳନ କରିବା ଏବଂ ଲୋକଙ୍କୁ କୌଣସି ବିପଦ ବିଷୟରେ ସତର୍କ କରାଇବା ପାଇଁ ଏହି ବାଦ୍ୟଯନ୍ତ୍ର ବ୍ୟବହାର କରାଯାଉଥିଲା।

ଏହାର ଏକ ପାରମ୍ପରିକ ରୂପ 'ବୀର ମୁରାସୁ' ଯୁଦ୍ଧ ସମ୍ବନ୍ଧୀୟ କାର୍ଯ୍ୟରେ ବ୍ୟବହୃତ ହେଉଥିଲା।

Advertisment ତେବେ ଆନ୍ଧ୍ରପ୍ରଦେଶ ଆଡ଼କୁ ଆସୁଥିବା ବାତ୍ୟାର ନାଁ ତାମିଲ୍‌ ଶବ୍ଦ ଅନୁସାରେ କାହିଁକି ରଖାଗଲା, କିଏ ଦେଇଥିଲା ଏହି ନାଁ ଏବଂ କେଉଁ ନିୟମ ଅନୁସାରେ ବାତ୍ୟାର ନାମକରଣ ହୁଏ...

ଏହା ପଛରେ ରହିଛି ଏକ ନିର୍ଦ୍ଦିଷ୍ଟ ଆନ୍ତର୍ଜାତିକ ବ୍ୟବସ୍ଥା।

କାହିଁକି ରଖାଗଲା 'ମୁରାସୁ' ନାମ?

ବାତ୍ୟାର ନାମକରଣ ପାଇଁ ଭାରତ ସମେତ ଉତ୍ତର ଭାରତ ମହାସାଗର ଅଞ୍ଚଳର ୧୩ଟି ଦେଶ ନିଜ ନିଜ ପକ୍ଷରୁ ନାମ ପ୍ରସ୍ତାବ ଦେଇଥାନ୍ତି।

ଭାରତ ମଧ୍ୟ ଏହି ତାଲିକାରେ ଅନେକ ନାମ ଯୋଡ଼ିଛି।

'ମୁରାସୁ' ହେଉଛି ଭାରତ ପକ୍ଷରୁ ପ୍ରସ୍ତାବିତ ଏକ ନାମ।

ଏହା ତାମିଲ୍‌ ଭାଷାର ଏକ ପାରମ୍ପରିକ ବାଦ୍ୟଯନ୍ତ୍ରକୁ ବୁଝାଏ।

Advertisment ଏହି ଢୋଲକୁ ପୂର୍ବରୁ ଯୁଦ୍ଧ, ଉତ୍ସବ ଓ ଜରୁରୀ ସୂଚନା ପ୍ରଦାନ ଭଳି ବିଭିନ୍ନ କାର୍ଯ୍ୟରେ ବ୍ୟବହାର କରାଯାଉଥିଲା।

ଲୋକଙ୍କୁ ଏକାଠି କରିବା କିମ୍ବା କୌଣସି ଘଟଣା ସମ୍ପର୍କରେ ସତର୍କ କରାଇବା ପାଇଁ ଏହା ବାଜୁଥିଲା।

ତେଣୁ ବାତ୍ୟାର ଏହି ନାମ ଏକ ସାଂସ୍କୃତିକ ପରିଚୟ ବହନ କରୁଛି।

ତେବେ କୌଣସି ବାତ୍ୟାର ନାମ ତାହାର ଶକ୍ତି, ତୀବ୍ରତା କିମ୍ବା ବିପଦର ସ୍ତରକୁ ସୂଚାଏ ନାହିଁ।

ଏଥିପାଇଁ ପାଣିପାଗ ବିଭାଗର ସତର୍କ ସୂଚନା ଓ ପୂର୍ବାନୁମାନକୁ ହିଁ ଗୁରୁତ୍ୱ ଦିଆଯାଏ।

ବାତ୍ୟା 'ଅର୍ଣ୍ଣବ' ପରେ କେମିତି ଆସିଲା 'ମୁରାସୁ'?

ବାତ୍ୟାର ନାମକରଣ କୌଣସି ଦେଶର ଉପକୂଳକୁ ଲକ୍ଷ୍ୟ କରି ହୁଏ ନାହିଁ।

ଏହା ଏକ ପୂର୍ବନିର୍ଦ୍ଧାରିତ କ୍ରମ ଅନୁସାରେ କରାଯାଏ।

ଉତ୍ତର ଭାରତ ମହାସାଗର ଅଞ୍ଚଳ ପାଇଁ ମୋଟ ୧୬୯ଟି ବାତ୍ୟା ନାମର ତାଲିକା ରହିଛି।

ଏଥିରେ ୧୩ଟି ଦେଶ ପ୍ରତ୍ୟେକ ୧୩ଟି ଲେଖାଏଁ ନାମ ପ୍ରସ୍ତାବ କରିଛନ୍ତି।

ଏହି ଦେଶଗୁଡ଼ିକର ନାମକୁ ଇଂରାଜୀ ବର୍ଣ୍ଣମାଳା କ୍ରମରେ ରଖାଯାଇଛି ଏବଂ ସେହି ଅନୁସାରେ ନାମଗୁଡ଼ିକ ବ୍ୟବହାର ହୁଏ।

ଏହି କ୍ରମରେ ବାଂଲାଦେଶ ପକ୍ଷରୁ ପ୍ରସ୍ତାବିତ 'ଅର୍ଣ୍ଣବ' ପରେ ଭାରତର 'ମୁରାସୁ' ରହିଛି।

ଏହା ପରେ ଇରାନ ପକ୍ଷରୁ ପ୍ରସ୍ତାବିତ 'ଆକଭାନ୍‌' ନାମ ଆସିବ।

ଅର୍ଥାତ୍‌ ଆନ୍ଧ୍ରପ୍ରଦେଶ ଉପକୂଳ ଆଡ଼କୁ ବାତ୍ୟା ମୁହାଁଇଥିବାରୁ ଏହାର ନାମ 'ମୁରାସୁ' ରଖାଯାଇନାହିଁ।

ବରଂ ପୂର୍ବରୁ ନିର୍ଦ୍ଧାରିତ ତାଲିକାରେ ଏହା ଥିବାରୁ ଏହାକୁ ଏହି ନାଁ ଦିଆଯାଇଛି।

ବଙ୍ଗୋପସାଗର ଓ ଆରବ ସାଗରରେ ସୃଷ୍ଟି ହେଉଥିବା ବାତ୍ୟା ପାଇଁ ଏହି ସମାନ ତାଲିକା ବ୍ୟବହାର କରାଯାଏ।

କିଏ ରଖେ ବାତ୍ୟାର ନାମ?

ବାତ୍ୟାର ନାମକରଣ ପ୍ରକ୍ରିୟାରେ ତିନୋଟି ପ୍ରମୁଖ ପର୍ଯ୍ୟାୟ ରହିଛି।

ପ୍ରଥମେ ସଦସ୍ୟ ଦେଶଗୁଡ଼ିକ ନାମ ପ୍ରସ୍ତାବ କରନ୍ତି।

ପରେ ଆନ୍ତର୍ଜାତିକ ନିୟମ ଅନୁସାରେ ଗଠିତ ଆଞ୍ଚଳିକ କମିଟି ଏହି ନାମଗୁଡ଼ିକୁ ଯାଞ୍ଚ କରି ଅନୁମୋଦନ କରେ।

ଏହା ପରେ କୌଣସି ପାଣିପାଗ ପ୍ରଣାଳୀ ବାତ୍ୟାର ରୂପ ନେବା ସୁନିଶ୍ଚିତ ହେଲେ ତାହାକୁ ନାମକରଣ କରାଯାଇଥାଏ।

ଉତ୍ତର ଭାରତ ମହାସାଗର ଅଞ୍ଚଳ ପାଇଁ ଭାରତୀୟ ପାଣିପାଗ ବିଭାଗ (ଆଇଏମ୍‌ଡି) ହେଉଛି ନାମକରଣ ପାଇଁ ନିଯୁକ୍ତ ଆଞ୍ଚଳିକ କେନ୍ଦ୍ର।

ନୂଆଦିଲ୍ଲୀରେ ଥିବା ଏହି ସଂସ୍ଥା ବଙ୍ଗୋପସାଗର ଓ ଆରବ ସାଗରରେ ସୃଷ୍ଟି ହେଉଥିବା ବାତ୍ୟାକୁ ନାମ ଦେଇଥାଏ।

ବାତ୍ୟା ଭାରତ ବ୍ୟତୀତ ଅନ୍ୟ କୌଣସି ଦେଶର ଉପକୂଳକୁ ପ୍ରଭାବିତ କରିବାକୁ ଥିଲେ ମଧ୍ୟ ନାମକରଣ ଏହି ବ୍ୟବସ୍ଥା ଅନୁସାରେ ହୋଇଥାଏ।

ବାତ୍ୟାର ନାମକରଣ ପାଇଁ କ'ଣ ରହିଛି ନିୟମ?

ଯେକୌଣସି ଶବ୍ଦକୁ ବାତ୍ୟାର ନାମ ଭାବେ ଗ୍ରହଣ କରାଯାଏ ନାହିଁ।

ଏଥିପାଇଁ କିଛି ନିର୍ଦ୍ଦିଷ୍ଟ ନିୟମ ରହିଛି।

ପ୍ରସ୍ତାବିତ ନାମ ଛୋଟ, ସହଜରେ ଉଚ୍ଚାରଣଯୋଗ୍ୟ ଏବଂ ସର୍ବାଧିକ ୮ଟି ଅକ୍ଷର ମଧ୍ୟରେ ହେବା ଆବଶ୍ୟକ।

ଏହା କୌଣସି ବ୍ୟକ୍ତି, ଧର୍ମ, ସଂସ୍କୃତି, ଲିଙ୍ଗ କିମ୍ବା ରାଜନୈତିକ ବିଚାରଧାରାକୁ ଆଘାତ ପହଞ୍ଚାଉଥିବା ଭଳି ହୋଇପାରିବ ନାହିଁ।

ଏହା ସହିତ ନାମଟି ନିରପେକ୍ଷ ହେବା ଆବଶ୍ୟକ।

ଭାରତ ପକ୍ଷରୁ ମଧ୍ୟ ନାମ ଚୟନ ସମୟରେ ସାଧାରଣ ଲୋକଙ୍କ ପ୍ରସ୍ତାବକୁ ବିଚାରକୁ ନିଆଯାଇଥିଲା।

୨୦୨୦ରେ ଭାରତର ପ୍ରସ୍ତାବିତ ନାମଗୁଡ଼ିକୁ ଚୂଡ଼ାନ୍ତ କରିବା ପ୍ରକ୍ରିୟାରେ ଲୋକଙ୍କଠାରୁ ମିଳିଥିବା ପ୍ରସ୍ତାବ ମଧ୍ୟ ଯାଞ୍ଚ କରାଯାଇଥିଲା।

ତେବେ କୌଣସି ନାମ ତାଲିକାରେ ସ୍ଥାନ ପାଇବା ପୂର୍ବରୁ ତାହାର ଯାଞ୍ଚ ଓ ଅନୁମୋଦନ ଜରୁରୀ।

ଆପତ୍ତି ଉଠିଲେ ଆଞ୍ଚଳିକ କମିଟି ଏହାର ପୁନର୍ବିଚାର ମଧ୍ୟ କରିପାରେ।

କେତେ ବେଗରେ ପବନ ବହିଲେ ବାତ୍ୟାର ନାମକରଣ ହୁଏ?

ସମୁଦ୍ରରେ ଲଘୁଚାପ କିମ୍ବା ଅବପାତ ସୃଷ୍ଟି ହେବା ମାତ୍ରେ ଏହାକୁ ବାତ୍ୟାର ନାମ ଦିଆଯାଏ ନାହିଁ।

ଏଥିପାଇଁ ପବନର ବେଗ ନିର୍ଦ୍ଧାରିତ ସୀମାରେ ପହଞ୍ଚିବା ଆବଶ୍ୟକ।

ଉତ୍ତର ଭାରତ ମହାସାଗର ଅଞ୍ଚଳରେ କୌଣସି ପାଣିପାଗ ପ୍ରଣାଳୀର ସର୍ବାଧିକ ସ୍ଥାୟୀ ପବନର ବେଗ ଘଣ୍ଟାପ୍ରତି ୩୪ ନଟ୍‌ ବା ପ୍ରାୟ ୬୨ କିଲୋମିଟର ହେଲେ ଏହାକୁ 'ସାଇକ୍ଲୋନିକ୍‌ ଷ୍ଟର୍ମ' ବା ବାତ୍ୟା ଶ୍ରେଣୀରେ ରଖାଯାଏ।

ଏହି ସ୍ତରରେ ପହଞ୍ଚିବା ପରେ ଆଇଏମ୍‌ଡି ତାଲିକାର ପରବର୍ତ୍ତୀ ନାମ ଅନୁସାରେ ବାତ୍ୟାର ନାମକରଣ କରେ।

ଏହା ପୂର୍ବରୁ ଲଘୁଚାପ ଓ ଅବପାତ ଭାବେ ପାଣିପାଗ ବିଭାଗ ଏହାର ଗତିବିଧି ଉପରେ ନଜର ରଖିଥାଏ।

ଥରେ ନାମ ଦିଆଯିବା ପରେ ବାତ୍ୟାର ତୀବ୍ରତା ବଢ଼ିଲେ ମଧ୍ୟ ଏହାର ନାମ ବଦଳାଯାଏ ନାହିଁ।

ତେଣୁ 'ମୁରାସୁ' ଅଧିକ ଶକ୍ତିଶାଳୀ ହେଲେ ମଧ୍ୟ ଏହା ସେହି ନାମରେ ହିଁ ପରିଚିତ ରହିବ।

'ମୁରାସୁ' ପରେ କେଉଁ ନାମ ରହିଛି?

ବାତ୍ୟାର ନାମକରଣ ତାଲିକାରେ 'ମୁରାସୁ' ପରେ ଇରାନ ପକ୍ଷରୁ ପ୍ରସ୍ତାବିତ 'ଆକଭାନ୍‌' ନାମ ରହିଛି।

ତେଣୁ ଭବିଷ୍ୟତରେ ଉତ୍ତର ଭାରତ ମହାସାଗର ଅଞ୍ଚଳରେ ସୃଷ୍ଟି ହେଉଥିବା କୌଣସି ପାଣିପାଗ ପ୍ରଣାଳୀ ବାତ୍ୟାର ରୂପ ନେବା ପରେ ତାହା ଏହି ନାମରେ ନାମିତ କରାଯିବ।