ନିଜେ ଅସୁରକ୍ଷିତ, ଅନ୍ୟଙ୍କୁ ଦେଉଛନ୍ତି ସୁରକ୍ଷା! ବିପଦସଙ୍କୁଳ କୋଠାରେ ପୋଲିସ

ନନ୍ଦିଘୋଷ ବ୍ୟୁରୋ : ବାହାରେ ଚକାଚକ୍‌, ହେଲେ ଭିତରେ ବିପଦ। ବିପଦସଙ୍କୁଳ କୋଠାରେ ଚାଲିଛି ପୋଲିସ ଏଡ୍ ପୋଷ୍ଟ। ଦୀର୍ଘ ଦିନ ଧରି ଏଭଳି ଅସୁରକ୍ଷିତ ପରିବେଶରେ ଡ୍ୟୁଟି କରୁଛନ୍ତି ପୋଲିସ କର୍ମଚାରୀ। ଜଗତସିଂହପୁର ଜିଲ୍ଲା ମୁଖ୍ୟ ଚିକିତ୍ସାଳୟ ପରିସରରେ ଥିବା ଏହି ଏଡ୍ ପୋଷ୍ଟର ଅବସ୍ଥାକୁ ନେଇ ଚିନ୍ତା ବଢ଼ିଛି। ହସ୍ପିଟାଲରେ କାର୍ଯ୍ୟରତ ଡାକ୍ତର, କର୍ମଚାରୀ, ରୋଗୀ ଓ ସେମାନଙ୍କ ପରିଜନଙ୍କୁ ସୁରକ୍ଷା ଯୋଗାଇ ଆସୁଥିବା ପୋଲିସ କର୍ମଚାରୀମାନେ ନିଜେ ଏବେ ଅସୁରକ୍ଷିତ ଅବସ୍ଥାରେ ଡ୍ୟୁଟି କରୁଛନ୍ତି। କୋଠାର ବିଭିନ୍ନ ସ୍ଥାନରେ ଦୁର୍ବଳତା ଦେଖାଦେଇଥିବାରୁ ଯେକୌଣସି ସମୟରେ ଅଘଟଣ ଘଟିବା ଆଶଙ୍କା ରହିଛି। ଏହି ସମସ୍ୟାର ସମାଧାନ ପାଇଁ ସ୍ୱାସ୍ଥ୍ୟ ବିଭାଗ ପକ୍ଷରୁ ବାରମ୍ବାର ଚିଠି ଲେଖାଯାଉଛି। ଜିଲ୍ଲା ମୁଖ୍ୟ ଚିକିତ୍ସାଳୟର ଅତିରିକ୍ତ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡା. ସରୋଜ କୁମାର ଜେନା ମଧ୍ୟ ଏନେଇ ପୂର୍ତ୍ତ ବିଭାଗକୁ ଚିଠି ଦେଇଥିବା କହିଛନ୍ତି। ତେବେ ବାରମ୍ବାର ଚିଠି ସତ୍ତ୍ୱେ ପୂର୍ତ୍ତ ବିଭାଗ ପକ୍ଷରୁ ଆବଶ୍ୟକ ପଦକ୍ଷେପ ନିଆଯାଉନଥିବାରୁ ସେ ଦୁଃଖ ପ୍ରକାଶ କରିଛନ୍ତି।

ନିକଟରେ ଦିଲ୍ଲୀରେ ଏକ କୋଠା ଭୁଶୁଡ଼ିବା ପରେ ରାଜ୍ୟର ବିପଦସଙ୍କୁଳ କୋଠାଗୁଡ଼ିକର ସ୍ଥିତି ଯାଞ୍ଚ ଓ ଆବଶ୍ୟକ ପଦକ୍ଷେପ ନେବା ଉପରେ ଗୁରୁତ୍ୱ ଦିଆଯାଇଛି। ଏଭଳି ସ୍ଥିତିରେ ଜଗତସିଂହପୁର ଜିଲ୍ଲା ମୁଖ୍ୟ ଚିକିତ୍ସାଳୟର ବିପଦସଙ୍କୁଳ ପୋଲିସ ଏଡ୍ ପୋଷ୍ଟ ପ୍ରତି ପୂର୍ତ୍ତ ବିଭାଗ କାହିଁକି ଗୁରୁତ୍ୱ ଦେଉନାହିଁ, ତାହାକୁ ନେଇ ସାଧାରଣରେ ପ୍ରଶ୍ନ ଉଠିଛି। ଅଘଟଣ ଘଟିବା ପୂର୍ବରୁ ଏହି କୋଠାର ମରାମତି କିମ୍ବା ବିକଳ୍ପ ବ୍ୟବସ୍ଥା କରିବାକୁ ଦାବି ହେଉଛି।