ବାର୍‌ହା ଶିକାର ପାଇଁ ବାଣ ଭିଡୁଥିବାବେଳେ ଘରୁ ଶୁଭିଲା ଚିତ୍କାର: ଆଉ ତା’ପରେ ଘଟିଲା..

ଦେବଗଡ,୨୧୮(ଶଶାଙ୍କ ଶେଖର ଝାଙ୍କର): ବାରକୋଟ ଥାନାଞ୍ଚଳ ଗୁରୁସଙ୍ଗ ଗ୍ରାମରେ ବାର୍‌ହା ଶିକାର ପାଇଁ ବାଣ ଭିଡୁଥିବା ବେଳେ ବିସ୍ଫୋରଣ ଘଟି ୨ଜଣ ବ୍ୟକ୍ତି ଗୁରୁତର ଆହତ ହୋଇଥିବା ଜଣାପଡିଛି । ଆହତ ବ୍ୟକ୍ତି ଦ୍ୱୟ ଗୁରୁସଙ୍ଗ ଗ୍ରାମର ନନ୍ଦ ଧିବର ଓ ଝୁନୁ ମହାକୁଳ ବୋଲି ଜଣାପଡିଛି। ଗ୍ୟାସ ଟାଙ୍କି (ସିଲିଣ୍ଡର) ବିସ୍ଫୋରଣରେ ଉଭୟେ ଆହତ ହୋଇଥିବା ନନ୍ଦଙ୍କ ପରିବାର ଲୋକେ କହୁଥିବା ବେଳେ ନନ୍ଦ ଓ ଝୁନୁ ବାର୍‌ହା ଶିକାର ପାଇଁ ଶକ୍ତିଶାଳୀ ବାଣ ଭିଡୁଥିବାବେଳେ ଏହି ବିସ୍ଫୋରଣ ଘଟିଥିବା ବିଶ୍ୱସ୍ତ ସୂତ୍ରରୁ ସୂଚନା ମିଳିଛି ।
ସୂଚନା ଅନୁଯାୟୀ, ଗୁରୁବାର ରାତିରେ ଗୁରୁସଙ୍ଗ ଗ୍ରାମର ନନ୍ଦ ଧିବରଙ୍କ ଘରେ ପଚଣ୍ଡ ଶବ୍ଦ ସୃଷ୍ଟି ହେବାସହ ଘର ଭିତରୁ ଚିତ୍କାର ଶହ କାନ୍ଦ ବୋବାଳି ଶୁଣିବାକୁ ମିଳିଥିଲା। ଗ୍ରାମବାସୀମାନେ ସେଠାକୁ ଯାଇ ବିସ୍ଫୋରଣରେ ନନ୍ଦ ଧିବରଙ୍କ ଶରୀରର ସମ୍ମୁଖ ବାଘ ଓ ଝୁନୁ ମହାକୁଳଙ୍କ ଡାହାଣ ହାତ ପୋଡିଯିବା ସହ ସେମାନେ ଗୁରୁତର ଆହତ ହୋଇଥିବା ଏବଂ ଘରର ବହୁ ଆସବାବ ପତ୍ର ନଷ୍ଟ ହୋଇଥିବା ଦେଖିବାକୁ ପାଇଥିଲେ। ଏନେଇ ସେମାନେ ଆମ୍ବୁଲାନ୍ସ ଏବଂ ବାରକୋଟ ଥାନା ପୋଲିସ ସୂଚନା ଦେବା ପରେ ଆମ୍ବୁଲାନ୍ସ ସହାୟତାରେ ଉଭୟଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଚିକିତ୍ସା ନିମନ୍ତେ ନିକଟସ୍ଥ ଅନୁଗୋଳ ଜିଲାର ପାଳଲହଡା ଡାକ୍ତରଖାନାକୁ ନିଆଯାଇଥିଲା। ସେଠାରେ ଉଭୟେ ଚିକିତ୍ସାଧିନ ଥିବାବେଳେ ବାରକୋଟ ଥାନା ପୋଲିସ ଘଟଣା ସ୍ଥଳରେ ପହଞ୍ଚି ଘଟଣାର ତଦନ୍ତ ଚଳାଇଛି। ମାତ୍ର ପରିବାରର ସଦସ୍ୟସଦସ୍ୟାମାନେ ଘରେ ନଥିବା ଏବଂ ଘରର କବାଟରେ ତାଲା ପଡିଥିବାରୁ ବିସ୍ଫୋରଣର ପ୍ରକୃତ କାରଣ ବର୍ତ୍ତମାନ ପର୍ଯ୍ୟନ୍ତ ଜଣାପଡିନାହିଁ ଓ ଅଧିକ ତଦନ୍ତ ପରେ ସ୍ପଷ୍ଟ ହେବ ବୋଲି ପୋଲିସ ପକ୍ଷରୁ କୁହାଯାଇଛି।