Exercises To Reduce Waist Size : ଜିମ୍‌ରେ ଝାଳ ବୁହାଇ ବି କମୁନି ପେଟର ଚର୍ବି? ମହିଳାଙ୍କ ପାଇଁ ୫ ବ୍ୟାୟାମ, ଅଣ୍ଟା ହେଇଯିବ ପୂରା ସାଇଜ୍

ଆଜିକାଲି ଅନେକ ମହିଳା ପେଟରେ ଜମିଥିବା ଅତିରିକ୍ତ ଚର୍ବିକୁ ନେଇ ଚିନ୍ତିତ। କେହି ଜିମ୍‌ରେ ଘଣ୍ଟା ଘଣ୍ଟା ପରିଶ୍ରମ କରୁଛନ୍ତି ତ ଆଉ କେହି କେବଳ ପେଟର ବ୍ୟାୟାମ କରୁଛନ୍ତି। ତଥାପି ଆଶାନୁରୂପ ଫଳ ମିଳୁନାହିଁ। ଫିଟ୍‌ନେସ୍ ବିଶେଷଜ୍ଞଙ୍କ ଅନୁସାରେ, ଶରୀରର କୌଣସି ନିର୍ଦ୍ଦିଷ୍ଟ ଅଂଶର ବ୍ୟାୟାମ କଲେ କେବଳ ସେହି ସ୍ଥାନର ଚର୍ବି କମିନଥାଏ। ନିୟମିତ ବ୍ୟାୟାମ ସହ ସନ୍ତୁଳିତ ଖାଦ୍ୟାଭ୍ୟାସ ଜରୁରୀ।

ପ୍ଲାଙ୍କ୍ (Plank)

ପେଟର ମାଂସପେଶୀକୁ ମଜଭୁତ କରିବା ପାଇଁ ପ୍ଲାଙ୍କ୍ ଏକ ଉପଯୋଗୀ ବ୍ୟାୟାମ। ଏହା ପେଟ ସହ ଅଣ୍ଟା ଓ ପିଠିର ମାଂସପେଶୀକୁ ସକ୍ରିୟ କରିଥାଏ। ପ୍ରଥମେ ୨୦ରୁ ୩୦ ସେକେଣ୍ଡ ଅଭ୍ୟାସ କରି ଧୀରେ ଧୀରେ ସମୟ ବଢ଼ାଇପାରିବେ।

ମାଉଣ୍ଟେନ୍ କ୍ଲାଇମ୍ବର୍ସ (Mountain Climbers)

ଏହି ବ୍ୟାୟାମରେ ହାତ ଭୂମିରେ ରଖି ଗୋଟିଏ ପରେ ଗୋଟିଏ ଆଣ୍ଠୁକୁ ଛାତି ଆଡ଼କୁ ଆଣିବାକୁ ପଡ଼େ। ଏହା ହୃଦ୍‌ସ୍ପନ୍ଦନ ବଢ଼ାଇବା ସହ ପେଟ ଓ ଶରୀରର ଅନ୍ୟାନ୍ୟ ମାଂସପେଶୀକୁ ସକ୍ରିୟ କରିଥାଏ।

ଲେଗ୍ ରେଜେସ୍ (Leg Raises)

ଚଟାଣରେ ଶୋଇ ଦୁଇ ଗୋଡ଼କୁ ଧୀରେ ଉପରକୁ ଉଠାଇ ପୁଣି ତଳକୁ ଆଣିବାକୁ ପଡ଼େ। ଏହା ପେଟର ମାଂସପେଶୀକୁ ମଜଭୁତ କରିଥାଏ। ତେବେ ଅଣ୍ଟାରେ ଅତ୍ୟଧିକ ଚାପ ନପଡ଼ିବା ପାଇଁ ସଠିକ୍ ପଦ୍ଧତି ଅନୁସରଣ କରିବା ଆବଶ୍ୟକ।

ବାଇସାଇକେଲ୍ କ୍ରଞ୍ଚେସ୍ (Bicycle Crunches)

ଏହି ବ୍ୟାୟାମରେ ସାଇକେଲ୍ ଚଲାଇବା ଭଳି ଗୋଡ଼ ଚଳାଇବା ସହ ଶରୀରର ଉପର ଅଂଶକୁ ଘୂରାଇବାକୁ ପଡ଼େ। ଏହା ପେଟର ମଧ୍ୟଭାଗ ଓ ଦୁଇ ପାର୍ଶ୍ୱର ମାଂସପେଶୀକୁ ମଜଭୁତ କରିବାରେ ସାହାଯ୍ୟ କରେ।

ହାଇ ଇଣ୍ଟେନ୍‌ସିଟି ଇଣ୍ଟରଭାଲ୍ ଟ୍ରେନିଂ (HIIT)

ଏଥିରେ କିଛି ସମୟ ଦ୍ରୁତ ବ୍ୟାୟାମ କରିବା ପରେ ଅଳ୍ପ ବିଶ୍ରାମ ନିଆଯାଏ। ଜମ୍ପ ସ୍କ୍ୱାଟ୍ ଓ ବର୍ପିଜ୍ ଭଳି ବ୍ୟାୟାମ ଏଥିରେ ସାମିଲ। ଏହା ଶରୀରର କ୍ୟାଲୋରି ଖର୍ଚ୍ଚ ବଢ଼ାଇବା ସହ ଓଜନ ନିୟନ୍ତ୍ରଣରେ ସାହାଯ୍ୟ କରିପାରେ।

ମନେ ରଖନ୍ତୁ: କେବଳ ବ୍ୟାୟାମ ନୁହେଁ, ସୁଷମ ଖାଦ୍ୟ, ପର୍ଯ୍ୟାପ୍ତ ନିଦ ଓ ନିୟମିତ ଶାରୀରିକ ପରିଶ୍ରମ ମଧ୍ୟ ଜରୁରୀ। ନୂଆ ବ୍ୟାୟାମ ଆରମ୍ଭ କରିବା ପୂର୍ବରୁ, ବିଶେଷକରି ଗର୍ଭାବସ୍ଥାରେ କିମ୍ବା କୌଣସି ସ୍ୱାସ୍ଥ୍ୟ ସମସ୍ୟା ଥିଲେ, ଡାକ୍ତର କିମ୍ବା ପ୍ରଶିକ୍ଷିତ ଫିଟ୍‌ନେସ୍ ବିଶେଷଜ୍ଞଙ୍କ ପରାମର୍ଶ ନିଅନ୍ତୁ।