ଅଲ-ଟାଇମ ବେଷ୍ଟ ଫିଲ୍ଡର୍ସ୍-୧୧ ଘୋଷଣା: ୪ ଭାରତୀୟଙ୍କୁ ମିଳିଲା ସ୍ଥାନ, ଯୁବରାଜ ବାଦ୍
ନୂଆଦିଲ୍ଲୀ,୩।୧୦: କ୍ରିକେଟ୍ର ରନ ଓ ଉଇକେଟ ସହ ଫିଲ୍ଡିଂ ମଧ୍ୟ ମ୍ୟାଚ୍ର ଗତିପଥ ବଦଳାଇବାରେ ବଡ଼ ଭୂମିକା ନିଏ। ଏକ ଚମତ୍କାର କ୍ୟାଚ, ଦ୍ରୁତ ଥ୍ରୋ କିମ୍ବା ସଠିକ ଡାଇରେକ୍ଟ ହିଟ ମ୍ୟାଚ୍ର ଫଳାଫଳ ବଦଳାଇପାରେ। ଏହି ପରିପ୍ରେକ୍ଷୀରେ ପୂର୍ବତନ ଭାରତୀୟ ବ୍ୟାଟର୍ ସୁବ୍ରମଣ୍ୟମ ବଦ୍ରିନାଥ ଏବଂ ଆର୍. ଶ୍ରୀଧର ନିଜ ପସନ୍ଦର ଅଲ-ଟାଇମ ବେଷ୍ଟ ଫିଲ୍ଡର୍ସ ଏକାଦଶ ଚୟନ କରିଛନ୍ତି। ଏହି ଏକାଦଶରେ ଭାରତର ୪ ଜଣ ଖେଳାଳି ସ୍ଥାନ ପାଇଛନ୍ତି। ତେବେ ନିଜ ସମୟର ଅନ୍ୟତମ ଚମତ୍କାର ଫିଲ୍ଡର୍ ଭାବେ ପରିଚିତ ଯୁବରାଜ ସିଂହଙ୍କୁ ଏହି ତାଲିକାରେ ସ୍ଥାନ ମିଳିନାହିଁ।
ଅଷ୍ଟ୍ରେଲିଆର ପୂର୍ବତନ ଅଧିନାୟକ ମାର୍କ ଟେଲର ଏବଂ ୱେଷ୍ଟଇଣ୍ଡଜ୍ର ମହାନ ଗର୍ଡନ ଗ୍ରୀନିଜଙ୍କୁ ପନର୍ ଭାବେ ଚୟନ କରାଯାଇଛି। ଟେଲର ସ୍ଲିପ୍ରେ ନିଜ ଚମତ୍କାର କ୍ୟାଚିଂ ପାଇଁ ପରିଚିତ ଥିଲେ। ତାଙ୍କ ଅନ୍ତର୍ଜାତୀୟ କ୍ୟାରିୟରରେ ୨୧୭ ମ୍ୟାଚ୍ରୁ ୨୧୩ଟି କ୍ୟାଚ ରହିଛି। ଗ୍ରୀନିଜ ମଧ୍ୟ ୧୪୧ଟି କ୍ୟାଚ ଧରିଥିଲେ।
ମିଡିଲ ଅର୍ଡରରେ ଅଷ୍ଟ୍ରେଲିଆର ରିକି ପଣ୍ଟିଂ ଏବଂ ଆଣ୍ଡ୍ରୁ ସାଇମଣ୍ଡ୍ସଙ୍କୁ ରଖାଯାଇଛି। ପଣ୍ଟିଂ ନିଜ ଅନ୍ତର୍ଜାତୀୟ କ୍ୟାରିୟରରେ ୫୬୦ ମ୍ୟାଚ ଖେଳି ୩୬୪ଟି କ୍ୟାଚ ନେଇଥିଲେ। ସାଇମଣ୍ଡ୍ସ ତାଙ୍କ ଶକ୍ତିଶାଳୀ ଥ୍ରୋ ଏବଂ ଡାଇରେକ୍ଟ ହିଟ ପାଇଁ ବେଶ ଚର୍ଚ୍ଚିତ ଥିଲେ। ଏହା ସହ ୱେଷ୍ଟଇଣ୍ଡିଜ୍ର ଭିଭ ରିଚାଡର୍ସ ଏବଂ ଭାରତର ସୁରେଶ ରୈନାଙ୍କୁ ମଧ୍ୟ ଏକାଦଶରେ ସାମିଲ କରାଯାଇଛି। ରୈନା ଅନ୍ତର୍ଜାତୀୟ କ୍ରିକେଟ୍ରେ ମୋଟ ୧୬୭ଟି କ୍ୟାଚ ନେଇଛନ୍ତି। ଉଇକେଟକିପର୍ ଭାବେ ଭାରତର ପୂର୍ବତନ ଅଧିନାୟକ ଏମଏସ ଧୋନୀଙ୍କୁ ଚୟନ କରାଯାଇଛି। ଧୋନୀଙ୍କ ନାମରେ ଅନ୍ତର୍ଜାତୀୟ କ୍ରିକେଟ୍ରେ ୮୨୯ଟି ଉଇକେଟକିପିଂ ଡିସମିସାଲ ରହିଛି।
ଭାରତର ମହାନ ଅଲ୍ରାଉଣ୍ଡର୍ କପିଲ ଦେବ ଏବଂ ରବୀନ୍ଦ୍ର ଜଡେଜାଙ୍କୁ ମଧ୍ୟ ଏହି ଏକାଦଶରେ ସାମିଲ କରାଯାଇଛି। କପିଲ ଦେବ ଅନ୍ତର୍ଜାତୀୟ କ୍ରିକେଟ୍ରେ ୧୩୫ଟି କ୍ୟାଚ ନେଇଥିବାବେଳେ ଜଡେଜାଙ୍କ ନାମରେ ୩୭୭ ମ୍ୟାଚ୍ରେ ୧୫୮ଟି କ୍ୟାଚ ରହିଛି।
ଇଂଲଣ୍ଡର ବେନ ଷ୍ଟୋକ୍ସ ଏବଂ ଅଷ୍ଟ୍ରେଲିଆର ପୂର୍ବତନ ଦ୍ରୁତ ବୋଲର୍ ବ୍ରେଟ ଲିଙ୍କୁ ମଧ୍ୟ ଏହି ଅଲ-ଟାଇମ ଫିଲ୍ଡର୍ସ ଏକାଦଶରେ ସ୍ଥାନ ମିଳିଛି। ଷ୍ଟୋକ୍ସ ୨୭୯ଟି ଅନ୍ତର୍ଜାତୀୟ ମ୍ୟାଚ୍ରେ ୧୯୨ଟି କ୍ୟାଚ ନେଇଛନ୍ତି। ସେହିପରି ବ୍ରେଟ ଲି ୩୨୨ଟି ମ୍ୟାଚ୍ରେ ୮୩ଟି କ୍ୟାଚ ଧରିଥିଲେ।
ମାର୍କ ଟେଲର, ଗର୍ଡନ ଗ୍ରୀନିଜ, ରିକି ପଣ୍ଟିଂ, ଭିଭ ରିଚାଡର୍ସ, ସୁରେଶ ରୈନା, ଆଣ୍ଡ୍ରୁ ସାଇମଣ୍ଡ୍ସ, ଏମଏସ ଧୋନୀ(ଉଇକେଟକିପର୍), ବେନ ଷ୍ଟୋକ୍ସ, କପିଲ ଦେବ, ରବୀନ୍ଦ୍ର ଜଡେଜା ଏବଂ ବ୍ରେଟ ଲି।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
